Meghalaya-in medical service tan recruitment board hran din dawn

Meghalaya state cabinet chuan medical service tan recruitment board hran, Meghalaya Medical Services Recruitment Board din a remti.

Chief minister Conrad K Sangma chuan state chhunga general doctor post 366 leh specialist post 176 hnawh khah lohin a awm tih a sawi a, hemi thlir chung hian a hrana recruitment board din hi an rel tih a sawi.

Chief Minister chuan medical service lama post tam tak hnawhkhah loha a awmna chhan chu Meghalaya Public Service Commission (MPSC) in kum 2017 aṭang khan interview leh hna lakna tur ṭul dangte a kalpui theih loh vang niin a sawi bawk.

Sangma chuan Covid-19 hri leng vangin MPSC chuan department dang dangah pawh thawktu thar lakna tur hi a kalpui mumal lo tih a sawi. "Thla hnih thum chhungin, Meghalaya Medical Services Recruitment Borad kaltlangin, post ruak hnawhkhah dan tur hi an buaipui fel hman tum a ni," a ti.

Nilainia cabinet meeting chuan member pali awmna tur education commission din a remti bawk. Commission hi chairperson-in hoin, pahnih chu advisor leh pakhat secretary an ni ang. He commission hian school leh college kaihhnawih thil hrang hrang, zirna kalpui dan, institutional structure, salary leh management lamah te sorkar chu thurawn a pe ṭhin dawn a ni. Hei bakah New Education Policy, 2020 zulzuiin education system siamṭhatna tur kawngah hma an la bawk ang.

CM Sangma chuan a kaihhruai sorkar chuan education sector hmasawnna turin theitawp a chhuah a, a rah a rawn lang ṭan niin a sawi. NITI Aayog-in education sector-a PGI score a pekah, infrastructure leh facility lamah Meghalaya chu ram chhungah rank pahnihnaah a dah a ni, a ti.

State cabinet chuan Khasi leh Garo ṭawng chawilarna turin heng ṭawnga lehkhabu ziaktute tan State Literary Award siam a tum bawk. Khasi leh Garo lehkhabu tan a hran ve vein award hi siam ni ang a, pawisa fai Rs nuai 1 a keng tel ang. CM chuan Eight Schedule-a Khasi leh Garo ṭawng dah a nih theihna turin sorkar laipui an nawr mek thu a sawi bawk.