Dec 20 aṭangin Assam Assembly winter session nei dawn

Assam Assembly winter session chu December 20 aṭangin neih ṭan a ni dawn tih assembly principal secretary Hemen Das chuan a sawi.

Winter session hi ni nga neiin, December 24-ah an zo ang. September 12-19 khan autumn session an lo nei tawh a ni.

Session neih turah hian state tana hmasawnna kaihhnawih tur thil hrang hrangah thutlukna pawimawh tak tak siam a nih rin a ni. Karbi Anglong-a dengue leng mek chungchang pawh sawiho a ni ang. State chhunga infrastructure project hrang hrang - lei leh flyover siam chungchang te, Guwahati khawpuia traffic tawt chho zel tihziaawm dan turte leh Majuli district-a medical facility lam indaih loh dan te pawh an sawiho rin a ni bawk.

Assam Assembly Secretariat-in dress code siam
Assam Assembly Secretariat chuan thawktute inchei dan tur kaihhruaina a siam a, Assembly-ah T-shirt, jeans leh leggings-te hak a khap.

Assam Legislative Assembly princial secretary-in thuchhuah a siamah, hnathawktute chu Nilaini apiangin Assam traditional dress-a inthuam turin a ti a, a bak hnathawk ni dangah chuan formal dress-a inthuam turin a ti. Assembly session neih lai leh hun bi pawimawh bikah chuan Secretariat-in office uniform ha tura a tih ang chu eng rank pawhin a zawm tur a ni tiin, inchei dan tura kaihhruaina siam zawm lo chungah action lak a ni ang a, an hnathawk hunbi ang thawk tling lo chu an thla hlawh aṭangin 'cut' sak an ni ṭhin dawn tih a sawi bawk.

Hnathawktute hi zing dar 9:30-ah office thleng hman vek tur leh, biometric attendance system-ah an attendance dah lut a, office hour zawh hnuah chiah log out ṭhin turin thupek an ni.