Assam-AP CM-ten regional committee hmalakna thlir

Assam leh Arunachal Pradesh chuan ramri buaina chinfel dan buaipui tura ruat, regional committee-te hma lakna thlirin Ningani khan state pahnih chief minister-te kaihhruaiin meeting an nei.

Assam chief minister Himanta Biswa Sarma chuan Arunachal Pradesh chief minister Pema Khandu nena meeting an neih chu kumin July thlaa state pahnihte Namsai Declaration an ziah bawhzuina zel a nih thu a sawi.

Ningania Assam State Guest House, Koinadhora-a meeting neihah hian Assam border protection and development minister Atul Bora, Assam chief secretary Paban Kumar Borthakur, Arunachal Pradesh chief secretary Dharmendra bakah state pahniha senior officer-te an tel a ni.

Namsai Declaration hnuaiah, Assam leh Arunachal Pradesh-ah hian ramri buaina an neihna, Arunachal Pradesh-a district 12 leh an ramri Assam district-te a hmuna tlawha enfiah turte, tualchhung mite kawm tur tein regional committee 12 an din a ni. Committee hian an state sorkar ve ve hnenah report pein, rawtna te a thehlut dawn a ni. July thlaa state pahnih CM-te inbiakna an neihah, ramri buaina an neih meka khaw 123 zinga khaw 37-ah inremna hi siam phawt an remti.

Nov thla tawp lamah Assam-Meghalaya border talk chhunzawm
Assam hian a thenawm state dangte nen pawh ramri buaina a nei a, Meghalaya nena ramri chungchanga inbiak thawh hnihna chu tun thla tawp lam hian an nei leh dawn.

State pahnihte hian ramri buaina neihna, hmun 12 zinga hmun parukah inremna an siam tawh a, a bak hmun paruk danga inremna siam leh turin hma a la mek a ni.

Meghalaya chief minsiter Conrad K Sangma chuan border area paruk danga inremna siam tum hian hma lak ṭan a ni tawh a, committee-te pawhin hna a thawk mek a ni, a ti. Assam CM Sarma nen pawh inbiain, state pahnihte chuan North East Olympic Games zawh hunah meeting hi an nei thei dawn a ni, a ti.