Nagaland : Covid-19 hri len laia nurse chhawrten dah ngheh an phut

Nagaland sorkarin Covid-19 hri len hluar laia hri kaite enkawl tura nurse a lakte chuan an hnaah dah ngheh phutin Nilaini aṭang khan tiam chin awm loin nawrh an huaihawt.

Nurse-te hian ‘Department Recruited Aggrieved Nurse (DRAN) 2021’hmingin state civil secretariat junction-ah nawrh hi an huaihawt a ni. DRAN 2021 president Lijamo Odyuo chuan kum 2020, July 5-a state cabinet-in staff nurse post 50% seniority basis leh, a bak 50% direct recruitment-a lak tur a tih tawh chu zawm tura an phut thu a sawi.

Kum 2020, July thlaa state leilung fa ngei nurse-a lakna tura sorkarin advertisement a tihchhuahah khan, RAN member 129-te chu interview tura koh niin, merit basis-in health centre hrang hrangah dah an ni a, mahse a ngheta lak an ni lo. Hetih lai hian tun thla tir lam khan sorkar chuan nurse post 129 lak thar tur chu competitive examination kaltlanga lak turin Nagaland Public Service Commission kutah a hlan a ni.