MLA 17-te chungchanga thutlukna siamtu tur Meghalaya Governor

Meghlalaya High Court-in kar kaltaa Parliamentary Secretary ruat theihna dan a hnawl hnuah, Meghalaya Legis­lator 17-te assembly member aṭanga ban an nih leh nih loh tur chungchanga thutlukna siamtu tur chu ram dan­puiin a tarlan angin Go­vernor a ni a, hemi a nih avang hian Raj Bhavan thutlukna nghah a ni.

Raj Bhavan official lam thuchhuah chuan Governor Ganga Prasad-a'n hemi chungchangah hian state sorkar leh Assem­bly speaker thu an la ngaihchan thu an tarlang thung. Court thutlukna siam chungchangah Gover­nor chuan state sorkar leh Assembly speaker thuchhuah an la ngaihchan thu sawiin, Raj Bhavan official chuan anni lamin thuchhuah an neih ve leh Governor office chuan Election Commission thurawn a la ang a, thu­tlukna a siam ang, a ti.

November 9 khan Meghalaya High Court chuan thutlukna siamin, Parliamentary Secretary ruat chu ram danpui pel a nih avanga hlih a nih thu thuchhuah a siam a ni. He thutlukna hi Chief Justice Dinesh Maheshwari leh Justice Ved Prakash Vaish te kaihhruia division bench siam niin, state resi­dent Madal Sumer-a'n Parlia­mentary Secretary state-in a neih chu dan kalh a nih thu leh, PIL a file chung chang ngaihtuah a nih hnuah thutlukna hi an siam a ni.

Ram danpui Article 192-na chuan State House of Legislature Member reng reng ban an nih dawn chuan Article 191, clause 1-in a sawi angin thutlukna tawp chu Governor-in a siam ang tih a ni a, hemi a nih avang hian Par­liamnetary Secretary-te chungchangah pawh hian thutawp siam turin court chuan Governor hi a ruat thu an tarlang a, Election Commission ngaihdan pawh la turin a tih thu tarlan a ni bawk.

Hetih lai hian Legis­lator 17 zinga 10, Parlia­mentary Secretary aṭanga bang tate chuan Assembly member aṭanga ban an nih theihna tur dan erawh a awm lo niin a sawi ve thung.

Parliamnetary Sec­retary 17-te hi November 9-a Court-in thutlukna a siam hnu lawk khan Parliamnetary Secretary aṭanga an ban thu hi an sawi nghal a, Chief Minister Mukul Sangma pawhin a pawm thu a sawi ve nghal bawk a ni. Supreme Court pawhin July 26 khan 2004 kuma Assam dan siam Minister of State rank mil puia Parliamentary Secretary state ruat theihna chu a lo hnawl tawh bawk.

Chief Minister Mukul Sangma kaihhruaina hnuiah tuna Prliamntary Secretary an nihna aṭanga ban takte hian March 12, 2013 khan rinawmna thu an tiam a, Minister 12 te pui tura tih an ni. Hetih lai hian Meghalaya 60-Member Assembly Election hi Kumthar Fenruary-March-a neih tura ruahmanna siam a ni.