Assam ram lak hek a ni lo ang : Assam CM

Assam Chief Minister Sarba­nada Sonowal chuan sorkar laipui leh Nationalist Socialist Council of Nagaland (NSCN-IM) inremna siam kaihhnawihah thuchhuah siam lehin, Assam ram chhin lak hek a nih loh tur thu Thawṭanni khan a sawi nawn leh. He thu hi Union Home Minister Rajnath Singh nen inkawmna an neih hnu lawka a sawi a ni.

Sorkar laipui leh NSCN-IM-te hian August 3, 2015 daih tawh khan inrem lailawkna an lo siam tawh a, he inremna hi NSCN-IM general secretary Thuingaleng Muivah leh sorkar aiawh RN Ravi-te'n sign-in, Prime Minister Narendra Modi pawh he inremna thuthlung an ziah lai hian a awm ve bawk a ni. An inremna siam dan hi puanzar a nih loh avangin mi tamtak chuan an dodal nasa hle a, mi ṭhenkhat chuan Manipur leh Assam ramri tih danglam a ni dawn niin an ngai a ni.

Sonowal chuan sorkar laipuiin hmarchhka remna leh muanna a awm theih nan theihtawp a chhuah thu sawiin, Naga framework agree­ment chungchangah pawh Assam-in a ram chin engmah a chan dawn lo a ni, a ti. Assam map hi tih danglam a ni dawn lo a, mipuite zahawmna pawh humhim a ni dawn a ni, tiin Sonowal chuan a sawi.

Assam CM hian kar hmasa lam khan NSCN-IM-te'n Nagalim (Greater Nagaland) an ngiat chungchangah Assam ram hmun ṭhenkhat lak an tum ni a sawi awm chu chhangin, Assam-in a ram inchi khat pawh a hloh loh tur thu a lo sawi tawh bawk a ni.