Tripura : TIPRA Motha-in 'mega gathering' buatsaih

Tripura regional party, TIPRA Motha chuan Inrinni khan Agartala khawpuiah 'mega gathering' an buatsaih a, tel an ṭhahnem hle.

Vivekananda Ground-a punkhawmna buatsaih hi Greater Tipraland an phutna leh nawrna atana tih a nih thu parry hruaitu chuan a sawi. Party founder leh chairman Pradyot Kishore Manikya Debbarma leh president Bijoy Kumar Hrangkhawl ten thu an sawi. He meeting hi Hamro Sikkim Party (HSP) hotu Bhaichung Bhutia pawhin a telpui a ni.

Debbarma chuan hun rei tak Greater Tipraland an lo phut tawhna chu central lama hruaitute an hriattir nawn leh duh tih a sawi. An thil phut chu central lam chuan ngaihvenin, an thute an ngaithlak sak a hun tawh takzet a ni, a ti.

Tipraha Indigenous Progressive Regional Alliance (TIPRA) Motha hi kum 2021-a din a ni, Tripura leilung fate tan Greater Tipraland state hran siam an phut a ni. Party din thar chauh ni mah se, nikuma Tripura Tribal Areas Autonomous District Council inthlanah khan thlan tlin niin, seat awm zat 28 atangin seat 16 an la a ni.

TIPRA hotu Debbarman chuan India ramin zalenna a hmuh aṭang a kum 70 chuang hnuah pawh, Tripura leilung fate chuan anmahni ram ngeiah an dikna chanvo humhalh tumin an la bei a ni, a ti. Assembly inthlan lo awm turah an party-in thuneihna an chang a nih chuan, Tripura hnamte chu ram pek vek a tiam.