Manipur CM-in startup scheme thar tlangzarh

Manipur chief minister N Biren Singh chuan Inrinni khan state sorkar leh North Eastern Development Finance Corporation Ltd (NEDFi) thawkdunin an siam, Venture Fund for Manipur Startup Scheme 2.0 a tlangzarh.

Imphal-a Manipur Startup Workshop neihnaah Chief Minister chuan scheme thar hi tlangzarh a ni. He workshop hi industry leh internal trade tihchangtlunna tura state department of planning leh sorkar laipuiin an buatsaih a ni.

CM Singh chuan an state-a chhungkaw tinte tan eizawnna tur kawng kawhhmuh tumin a kaihhruai sorkar chuan hma a la mek tih a sawi a, scheme hrang hrangte kalpuiin, chhungkaw tina member pakhat talte direct leh indirect-a hna thawh tur an neih dan a ngaihtuahpui a ni, a ti. Kum 2017-a a kaihhruai BJP sorkar a din aṭang khan thalaiten hna thawh tur siam chu a dah pawimawh chho a, hemi atan hian Manipur Startup Scheme pawh siam a nih thu a sawi. He scheme hnuaiah hian startup 6,000 vel chu sum lama puihna pek an ni tawh tih a sawi bawk.

Singh chuan startup scheme chuan ṭhalaite chu hna zawngtu ni loin, hna siamtuah zawk a din chho mek a; Imphal West, Imphal East leh Churachandpur-ah youth skill centre dinna turin Rs vbc 10 ṭheuh pek an nih thu leh, Senapati, Ukhrul leh Chandel district tan pawh Rs vbc 5 ṭheuh ruahman a nih thu a sawi.

State chhung hmun tinah hmasawnna kalpuina turin 'Go to Village' leh 'Go to Hills' pawh kalpui a nih thu leh, an state chuan hma lam a pan zel thu Chief Minister chuan a sawi a ni.