Assam : ST status phutin vawiinah bandh huaihawt dawn

Assam-a hnam paruk - Adivasis (tea tribes), Moran, Muttock, Koch Rajbongshi, Tai Ahom, leh Chutiya-te chuan Scheduled Tribe status pek phutin vawiin hian state pumah bandh an huaihawt dawn.

Heng hnam parukte hian Soy Janagosthi Joutha Mancha hmingin bandh hi an huaihawt dawn a ni. Hnam parukte hi Assam-a Other Backward Classesah tel an ni a, Assam electoral roll-a awm zat zinga 30% aia tam an tling.

Kum 2014 Lok Sabha inthlanpui neih dawn khan, prime minister Narendra Modi chuan Bongaigaon-a rally a neihah an thil phut hi ngaihtuah a nih tur thu a lo sawi tawh a ni. Kum 2015-a state assembly inthlan neih dawnah, BJP chuan an manifesto-ah Assam-a hnam parukte hi ST status pek an nih theihna tura theihtawp chhuah an lo tiam tawh bawk.

Kum 2019 khan union home minister Amit Shah chuan heng hnam parukte ST status pekna tur hi union cabinet-in a pawm thu Lok Sabha-ah a puang. Hemi hnu hian Constitution (Scheduled Tribes) Order, 1950 siamṭhatna tur bill chu Parliament-ah pharh a ni bawk a, mahse tun thlengin tihkhawtlai a la ni.

ST status phuttu hnam parukte hian BJP chu an thutiam hlen lo leh, phatsantuah an puh. Kum 2014 inthlanpui neih hmaa ST status pek an nih loh chuan, BJP dodal zawngin an campaign dawn tih an sawi. Vawiina state chhunga bandh an huaihawt bakah, an thil phut nawrna atan hian November 30-ah Delhi-ah nawrh huaihawt chhunzawm an tum bawk.