Tripura-ah tea auction centre siam dawn

Tea Board of India chuan Tripura-ah tea auction centre siam tumin a ngaihtuah mek. Tripura Tea Development Corporation (TTDC) Chairman Santosh Saha chuan, "Tea Board of India chuan centre dinna tur hi a ngaihtuah mek, tih min hrilh a, centre din tur atan hian keini pawhin warehouse kan lo siam ve a ngai dawn a ni," a ti.

Tea auction centre hi North district headquarters, Dharmanagar-ah siam tum a nih thu sawiin, hei hi Tripura-a thingpui chingtute bakah, an ṭhenawm Assam-a Karimganj leh Cachar district-a thingpui chingtute pawhin an chhawr ṭangkai thei dawn niin Saha chuan a sawi bawk.

"Tripura-ah auction centre a awm loh avangin harsatna a awm phah fo a ni. Chief minister Manik Saha leh CM hlui Biplab Kumar Deb-te chuan sorkar laipuiah pawh an lo thlen tawh a, Bangladesh border aṭanga km 10 chauha hla, Sreemangal-ah Tripura-a thingpui chingtute an hralh ve theih dan tur ngaihtuah pui tura Bangladesh sorkar sawipui turin an lo ngen tawh a ni," a ti. 

Bangladesh leh India chu inṭhianṭha tak an ni chungin, India ram thingpuite hi negative list-ah an dah tih Saha chuan a sawi a, Indian tea-ah hian chhiah an la sang hle bawk a ni, a ti.

Sreemangal-a tea auction centreah Tripura thingpui chingtuten an tharchhuahte an hralh ve thei lo a, Guwahati leh Kolkata centre-te chu a panna a hlat avangin a senso a tam phah ṭhin bawk. Hei vang hian an state ngeia auction centre an nei ve thei tur chu thingpui chingtute tan a ṭangkai dawn hle a ni.

Tripura hian kumtin thingpui hi kg nuai 9-10 vel a tharchhuak ṭhin. Thingpui chinna huan lian, tea garden hi 60 vel awmin, heng zinga 42 chu mimal ta a ni a, 13 chu cooperative societyt-te enkawl niin, pathum chu state sorkar hnuaia Tripura Tea Development Corporation (TTDC) enkawl a ni thung Hei bak hian a tenau, small tea grower hi 3,000 dawn an awm bawk.