PM Modi-a'n AP-a Donyi Polo Airport a hawng dawn

Prime minister Narendra Modi chuan November 19 hian Arunachal Pradesh a tlawh dawn a, Itanagar-a Donyi Polo Airport a hawng ang.

Arunachal Pradesh chief secretary Dharmendra hoin Pathianni khan PM zin tur atana inbuatsaihnate an thlir ho a, police leh central intelligence agency aiawhte pawh an tel. CS chuan PM awm chhungin security lama thil felhlel engmah a awm tur a ni lo, a ti. A programme hman turte pawh hlawhtling taka hman a nih theihna tura theihtawp chhuah turin civil aviation, Airport Authority leh construction agency off icialte a chah bawk.

Dharmendra hian Prime Minister-in a hawn tur, airport terminal leh a site-te chu a hmuna kalin a endik nghal bawk a ni. Donyi Polo airport hi Airport Authority of India (AAI), sorkar laipui leh state sorkarten Rs vbc 645 senga an siam a ni. Airport runway hi meter 2,300-a thui niin, Airbus A320 pawh ṭum thei tura tih a ni. Airport gate hi state bird, Hornbill pianhmanga siam niin, Great Hornbill Gate tih a ni. Arunachali architect Arotty Panyang design a ni a, state mipuite ngaihhlut a hlawh nghal hle. Gate siamna atan hian an state chhunga mi mau leh cane a hmang a, feet 23-a sang, feet 82-a zau a ni a, a siam nan thla nga chhung hun an hmang a ni.