Manipur : Churachandpur-ah AYUSH Damdawiin tur lungpum phum

Manipur Health Minister L. jayantakumar Singh chuan Chura­chandpur district-a Moulvaiphei-ah AYUSH (Ayurvedic, Yoga & Naturopathy, Unani, Siddha, Homeopathy) damdawiin, khum 50 awmna tur lungphum chu Thawhlehni khan a phum. He damdawiin sakna tur atan hian cheng vaibelchhe 6.5 ruahman a ni thu tarlan a ni.

Dadmawiin sakna project hnuaiah hian G+2 building, G+3 buil­ding, Barrack Type Quar­ter, Vehicle Shed leh Compound Fencing-te a tel a, thla 12 chhunga sak zawh tura rua­hman­na siam a ni. L. Jayantakumar Singh chuan AYUSH hman uar hun a thlen thu sawiin, Ayurvedic damdawite chuan side effect a nei lo a ni, a ti. Man tlawmtea heng damdawite hi lei tur a awm thuai theih dawn thu a sawi bawk.

Singh chuan thlai damdawi ṭangkaina sawiin, lo nei mite tan phei chuan hamṭhatna a tam dawn thu a sawi. Lo nei mi ten heng damdawi siam theihna thlai hi an ching a nih chuan an tan hamṭhatna a la tam dawn a ni, a ti. Thlai damdawite chu tlang ramah a ṭhat duh thu a sawi bawk. Health Miniter chuan Prime Minister Narendra Modi duh anga district tina heng thlai damdawi chinna hmun hi siam a nih tur thu a sawi bawk a ni.

State Agriculture Minister V. Hangkhanlian pawhin thu sawiin AYUSH damdawiin sakna tur hian Moulvaiphei leh Churachandpur district-te tan chauh ni lo, ṭhalaite tan hna thar a siam belh phah dawn thu sawiin, sorkar hmalakna chu thlawp turin mipuite chu a ngen nghal bawk a ni.