Guwahati aṭangin Air Ambulance Service ṭan

Assam Transport, Industries and Commerce Minister Chandra Mohan Patowary chuan kar kalta Ningani khan air ambulance service - North Eastern Development Finance Corpo-ration Ltd (NEDFi) chu Dispur-ah a tlangzarh.

He air ambulance hi Delhi - based Flaps Aviation Private Ltd. in Guwahati aṭangin an bultum dawn a, a brand hmingah "Book Air Ambulance" tih a ni. Air ambulance chhungah hian damdawi lam kaihhnawih bungraw hrang hrang mai bakah, medical team an awm nghal dawn bawk a ni. Minister Patowary chuan air ambulance service tur chuan Assam leh hmarchhakah hriselna lama bung thar kai tirtu a nih ngei a beisei thu a sawi.

Air ambulance hi Guwahati aṭanga a service tawh dawn avang hian a rate a tlawm phah sawt ngei dawn a, Delhi aṭanga service ai chuan a letin a tlawm dawn a ni. Ambulance chhungah hian emergency-ah chuan taksa peng thlak (organ transplant) pawh a tih theih dawn thu tarlan a ni.

Minister chuan air ambu­lanc hi zan lamah chuan Lokpriya Gopinath Bordoloi International Airport-ah a dah theih dawn bawk niin a sawi a, thla leh aṭang chuan hman ṭan theih a beisei thu a sawi bawk. Spicejet Airways chuan zingkarah leh tlaiah Guwahti - Delhi inkarah he ambulance operate hi an lo remti tawh bawk.

Assam sorkarin Union Ministries of Ex­ternal Affairs and Civil Aviation chu Guwahti aṭanga ASEAN ram capital-te kalpawhna tur thawhtheihna service tir tura an ngen thu Minister chuan a sawi bawk a ni.