Assam-ah 'Namami Barak Festival' ṭan
Assam Chief Minister Sarbananda Sonowal chuan Inrinni khan Silchar-ah 'Namami Barak festival' a hawng a, Barak leh Brahmaputra luite chuan ṭawng inang pakhat - "Inunauna, inpumkhatna leh inremna an hmang a ni" a ti.
Assam CM chuan Namami Barak chu festival chauh ni loin heng lai vela hmu thar zawnna tura bul ṭanna a nih thu sawiin, festival an buatsaih chhan pawh heng lai ram vel hlutna zawngchhuak tur leh leilung hausakna hmuchhuak turtea buatsaih a nih thu a sawi. Festival chuan state economy hmasawnna a tihchak dawn tih sawiin, Assam tana hmasawnna tura rahbi pawimawh tak pakhat a ni, a ti. CM chuan Barak Valley chu hun rei tak ngaihsak loh leh hnuchhawn a ni chu pawi a tih thu a sawi. Sonowal chuan he festival hi henglai vela miten ramchhung hmundanga mite nena intluk tlanna an neihna tur hmanrua a nih thu a sawi bawk.
CM chuan Prime Minister Narendra Modi kaihhruaina hnuaiah sorkar laipui pawhin Barrak valley hmasawnna tur lam a ngaihtuah dawn thu sawiin, hmarchhak pumpui hmasawnna tur pawh ngaihtuah a nih thu a sawi. Sonowal chuan Railway Ministry pawn hma nasa taka an lak thu a sawi bawk a, Inrinni pawh khan Silchar Dibrugarh - Trivandrum rel service tur vai liam a nih thu a sawi bawk a ni.
CM hian Minister of State for Railways, Rajen Gohain chu Saurashtra aṭanga Dibrugarh leh Silchar service tur rel ngaihtuah turin a ngen nghal bawk. Silchar aṭanga Bay of Bengal, Bangladesh paltlanga lawng hmanga kal theihna tur pawh enfiah a nih mek thu sawiin, CM chuan he hian sumdawnna lamah pawh henglai mite tan hmsawnna a thlen ngei dawn a ni, a ti.