2021-ah hmarchhaka hel chetna 74%-in tlahniam : MHA

Ministry of home affairs (MHA) chuan kum 2014 aṭangin hmarchhak security dinhmunin ziaawm lam a pan chho zel a, kum 2014 nena khaikhinin kum 2021-a hel zawnga chetna thleng ṭhin chu 74% in a tlahniam a ti.

MHA report chuan kum 2014 khan hel chetna ṭum 824 thlengin, kum 2021-ah chuan 209-ah a tlahniam tih a tarlang. Kum 2014-2021 chhungin hel 5,319 chu thuneitute kutah an inpe tawh bawk. Hemi chhung vek hian security force-te nena inbeihnaah hel 580 thah niin, 9,103 man an ni bawk.

Kum 2021-ah helte pawikhawihna thlen avanga security thi zat chu kum 2014 aiin 60% in an tlem a, civil mi thi pawh 89% in an tlem tawh bawk. Security force pariat leh civil mi 23 an thi a ni. Nikum chhung vek khan hel 686 leh an ralthuam chi hrang hrang 367 man a ni. Thuneitute kuta inpe hi mi 1,473 an awm.

Hmarchhak security dinhmunin ziaawm lam a pan zel avangin, sipai hnena thuneihna sang pekna, Armed Forces (Special Powers) Act, 1958 (AFSPA) pawh Assam-a district 23 leh district pakhat hmun ṭhenkhatah hlih a ni tawh a, Manipur-a district paruk huamchhunga police station 15, Nagaland-ah district pasarih-a police station 15 area-ahte kumin April 1 aṭang khan hlih a ni tawh a ni, tiin report chuan a tarlang.

The Unlawful Activities (Prevention) Act, 1967 hnuaiah hmarchhak biala insurgent organisation 16 chu dan pawna hnawl, 'terrorist organisation'-ah puan an ni. Sorkar laipui chuan helte beihna kawnga state sorkarte pui turin Central Armed Police Force (CAPF) a dah bawk. Nepal, Bhutan, China, Bangladesh leh Myanmar-a international border-ah CAPF company 498 dah an ni a, state hrang hrangah hel laka beihpui thlakna kawnga pui turin company 405 dah an ni bawk.