Tripura : Congress-in Covid expenditure endik phut

Tripura Pradesh Congress hruaitu leh MLA Sudip Roy Barman chuan state sorkarin Covid-19 hri len laia mamawh a leina leh a sum hman chhuah dan chu special audit neih a phut.

Thawhṭannia Agartala-a press conference a neihah, Barman chuan state assembly inthlan neih hma ngeiin BJP kaihhruai sorkarin langtlang sorkar tia a invuah chu a taka tilang tura a phut thu a sawi. Hripui len lai hian mi tam takin mi harsa leh mamawhte tan sum an thawh thu sawiin, "Chief Minister relief fund atan state chhung hmun hrang hrang aṭangin sum tam tak thawh a, midangte pui turin mipuite chuan theihtawp an chhuah a ni. Sorkar chuan heng sum thawhkhawmte hi damdawi lam hmanrua, ventilator, khum leh health facility-a mamawh dang leina atante a hmang tih a sawi. Mahse hri leng a ziaawm hnuah, heng hmanrua ho hi hmuh tur an awm zui lo. CM relief fund-a sum lut zat hi kan hre lo. Heng sum lut hi mipuite ta a ni a, Tripura Pradesh Congress chuan sum lut leh a hman dan dik tak mipuite an hriat theihna tura special audit neih a phut a ni," a ti.

Barman chuan sorkar chu special audit nei a, report pawh December thla chhung ngeia mipuite hmuh tura tlangzarh turin a phut.

Congress hruaitu chuan social pension lakna tura sorkarin school certificate a phut tel chu a sawisel zui bawk. Sorkarin hriattirna a tihchhuah tharah, social pension dil turte tan hian age proof atan school certificate, Madhyamik exam admit care leh PRTC (Permanent Resident Certifcate) chauh pawm a ni dawn tih a tarlang. Mahse pension diltu tam zawk chuan heng document-te hi an nei lo a ni, tiin a sawi.