Meghalaya HC-in BJP hruaitu N Marak-a bail dilna phalsak

Meghalaya High Court chuan BJP hruaitu Bernard N Marak-a'n West Garo Hills district-a a farmhouse-a naupang kum thum mi pawngsuala puhna thubuaia bail a dilna chu a phalsak.

Justice W Diengdoh awmna single bench chuan Marak-a bail dil hi phalsak a nih thu a sawi rualin, naupang pawngsual nia sawi chungchangah Marak-a a inhnamhnawih tih finfiahna tur a awm lo tih a sawi bawk.

Bernard N Marak hi Garo Hills Autonomous District Council member niin, state BJP vice president a ni. A hmain police-ten a farmhouse an dapnaah silai nena hmuh a nih bakah, he hmun hi nawhchizawrhna hmun atana siam nia puh chungchangah thubuai siamsak a lo ni tawh bawk. Heng thubuaiah pawh hian bail a dilna phalsak a lo ni tawh bawk.

Court chuan bail-a dilna a phalsak rualin, Marak chu zin chhuak lo tur leh, finfiahna awmte tichhe lo turin a vaukhan lawk a, investigating officer-in a koh hun apiangin inlan turin a hrilh lawk nghal a ni.