ULFA-in Tinsukia-a Army ambush-tu an ni tih sawi

Assam helpawl, United Liberation Front of Asom (ULFA) chuan Thawhṭanni zinga Tinsukia district-a Assam Rifles patrol party ambush-tu an nih thu an sawi.

ULFA chuan media mite hnenah thu thawnin November 28-a 'Protest Day' an hman tur thu an sawi a, AR partrol party ambush chu 'Opreation Lakhipathar' hnuaia neih a nih thu an tarlang bawk.

AR team hi Barpathar area-a Pengeri-Digboi Road-ah helho hian an lo ambush a, IED tipuakin silaiin ṭum 20-30 vel an lo kap bawk. Sipaite hian an kap let ve nghal a, hel zinga pakhat an kap hliam niin an sawi. Sipaiten an beih let hnuah helho hi an tlanchhe zui nghal a ni. Remote device, battery, wire leh ei turte an tlanchhiatsan niin an sawi.

ULFA hian kum 1990-a Assam Rifles-ten an pawl laka beihpui an thlak, 'Operation Bajrang' an kalpui duh lohna lantirin Protest Day hi an hmang dawn a ni.