President-in hmarchhak a tlawh ; Manipur-ah North East Development Summit hawng dawn

President Ram Nath Kovind chuan a lo ruahman lawk tawh angin hmarchhak hmun hrang hrang a tlawhkual mek a, Pathianni khan Assam leh Arunachal Pradesh-te a tlawh. President hian vawiin Manipur-a North East Development Summit a hawng dawn bawk.

Arunachal Pradesh a tlawh hma hian Assam-a Lakhimpur District chu Pathianni chawhma lam khan a tlawh a, hetah hian Assam Governor Jagdish Muhki, Chief Minister Sarbananda Sonowal leh Minister Naba Doley-te'n Lilabari airport-ah an lo hmuak a ni. Lakhimpur District a tlawh hnu hian India Air Force thlawhtheihna hmangin chawhnu lamah Arunachal khawpui Itanagar a tlawh leh a, special assembly session-ah thu a sawi a ni.

Assembly session-a thu a sawinaah hian Ram Nath Kovind chuan, Association of Southeast Asian Nations (Asean) ramte nena insumdawn tawnna kawngah leh inkungkaihna ṭha neihna kawngah Arunachal chu hmahnruaitu a nih a beisei thu a sawi. Arunachal chu ram dang nena inri a nih avangin ram dang nena insumdawn tawnna kawngah hmun pawimawh tak a nih thu leh, 'Act East Policy' kaltlanga ASEAN ramte nen inkungkaihna ṭha tak neihna tur state a nih thu a sawi.

ASEAN hnuaiah hian Southeast Asia huamchhunga mi ram 10 awmin, legislator-te hma-a thu a sawinaah hian Kovind chuan ram hruaitute chu mipuite duhna tihlawhtling tura thlan tlin an nih hre reng turin a chah. ASEAN ram nena thawhdunna tur kawngah pawh kawng hawng tura a duh thu a sawi bawk. Legislator-te mipuite aiawh an nih thu leh an mahni vote duh lotute ai pawh an awh a ngaih tho thu sawiin, mipuite rin ngam ni turin a chah bawk a ni.

President hian state chhunga buaina hrang hrang awm ṭhinte pawh an chinfel tur a nih thu sawiin, mipuite duhdan humhimtu turin ni, a ti.

President chuan India ram chhunga mi hrang hrang chengte inlungrual taka chenho chu India chakna a ni, a ti bawk. President hian Arunachal-a Viveka­nanda Kendra valedictory function pawh hmanpui nghal bawkin, Thawṭanni chaw­hnu khan Assam-a Namami Barak Festival kharna hun a hmanpui leh a, Guwahati-a civic reception-ah pawh hun a hmang bawk.

Kovind hian vawiin hian Manipur a tlawh leh dawn bawk a, Imphal-a Nortn East Development Summit neih tur a hawng dawn a ni. He summit neih tur hi ni hnih awh tur niin, ram hnufual zawkte tan sumdawnna lam mai bakah an economic dinhmun chawisan nana buatsaih a ni a, state hrang hrang Chief Minister-te pawh tel turin ruahmanna an siam thu an tarlang.

Summit hi Delhi-based, Indian Foundation buatsaih tur niin he summit buatsaihtu zingah hian Union Minister eng emaw zat bakah, BJP hruaitu eng emaw zat an tel bawk a, Manipur sorkar nen inkawpin he summit hi an buatsaih a ni. Official thuchhuahin a tarlan danin he Summit-ah hian Asian Development Bank (ADB), Japan International Cooperation Agency (JICA) leh khawvel huap finance agency lar tak tak aiawhten hmarchhak biala hmsawnna awm theihna tura ruahmanna an siamte an pharh dawn a, ram hrang hrang ambassador-te pawh an tel dawn niin an tarlang.

Assam, Nagaland, Arunachal Pradesh leh Manipur Chief Minister-te pawh he summit hawnna hunah hian an tel dawn a, Union Commerce and Industry Minister Suresh Prabhu pawh a tel dawn a ni. President Ram Narh Kovind hian Summit hawnna hun a neih zawh hnu hian Manipur sorkar buatsaih Sangai Festival-ah hun a hmang leh dawn bawk a, Nilaini-ah Delhi a pan leh ang. Manipur-a a cham chhung hian Moiranga-a INA War Memorial a tlawh dawn bawk a ni.