Meghalaya-ah NSCN-K mi leh sa man

Naga hel - National Socia­list Council of Nagaland-Khap­lang (NSCN-K)-a an finance secretary Inovi Avika Assumi chu Shillong-ah man a ni.

Meghalaya Police leh Assam Rifles sipai ṭangkawpte chuan Assumi tawmna hmun, Demseiniong area chu Inrinni zan khan dapin, Assumi hi an man ta a ni.

East Khasi Hills District Police Chief Davies .R. Marak chuan Shillong-a a awm thu report an dawn bawhzuiin, a chet dan leh a kalnate chhuizui a nih thu a sawi. Hun eng emaw chen an enthlak hnuah a inah luhkhungin, an man zui ta a ni. Amah hi thu zawhfiah tura tih a ni. Poilce-te hian Assumi kut aṭang hian ralthuam engmah an man lo thung. NSCN-K te hi Nagaland, Manipur leh Arunachal Pradesh-ahte an che nasa hle a, India sipai an bei fo avang leh, an thah fo avangin Terrorist-a puan an ni.