Arunachal-a President zin China in dem

President Ram Nath Kovind-a'n Aruncahal Pradesh a tlawh chung­changah China chuan Thawhṭanni khan thu­chhuah siamin, ram pahnih inkara Arunachal chungchanga boruak ṭha lo awm laia President in a tlawh chu an dem thu an sawi.

Ram Nath Kovind hian Pathianni khan Arunachal hi tlawhin Special Assembly session-ah thu a sawi a, Vivekananda Kendra kum 40 tlin lawm­naah pawh hun a hmanpui bawk a ni.

Hei hi China chuan na taka sawiselin, Chinese Foreign Ministry thu­puangtu Lu Kang chuan Aruna­chal Pradesh tia an koh China chuan a pawmpui ngai loh thu sawiin, ramri chungchangah pawh thu chiang tak leh inremna a awmlo a ni, a ti.

China hian Arunachal hi Sou­thern Tibet-ah a pawm luih tlat avangin India hotuten an tlawh hian na takin a lo sawisel fo tawh ṭhin a ni. Hetih lai hian India lam chuan a ram chhung ngei a nih thu leh, Aruncahal chhungah an duh ang anga zalen taka hun an hman theih thu an lo sawi ve fo tawh bawk.

Lu chuan ram pahnihte chuan ramri chungchangah hian inbiakna an kalpui mek thu leh inremna an la siam loh thu a sawi ve thung.

China chuan India ram hruai­tuten Arunachal-a an duh ang anga hun an hmang hi a dem thu sawiin Lu chuan, China leh India inlaichinna chu dinhmun ṭha lo taka a awm mek thu a sawi.

China thupuangtu chuan India chu boruak ṭha tak hnuaia inbiakna kalpui tura beisei a nih thu pawh sawiin, ram pahnihte inkara boruak ṭha lo awm chu a zual zel loh nana hma a lak a beisei thu a sawi bawk.

China leh India hian ramri chungchangah hian inbiakna vawi 19 lai an nei tawh a, thla leh hian New Delhi-ah a vawi 20-na tur neih leh tura ruahmanna siam a ni.

November thla tir lama Defence Minister Nirmala Sitharaman-i'n Arunachal a tlawh khan China hian a lo sawisel tawh a, Sitharaman-i hian na takin a chhanglet a ni. Tibetan Spiritual leader Dalai Lama in a tlawh ṭum pawh khan China hian na takin a dem thu a sawichhuak bawk a ni.