Assam APSC Scam : ACS Officer Rumi Saikia Police kutah inpe

Assam Public Service Commi­ssion (APSC) scam kalzelah Thawhṭanni khan Assam Civil Service (ACS) Officer Rumi Saikia chu police kutah a in pe ve leh.

APSC buaina kal zelah Assam sorkar officer Police ten an man hi 23 an ni ta a, police te chuan midang pahnih an la zawn mek thu an sawi.

Police Official thuchhuah chuan, Rumi Saikia a inpek takah chuan midang pahnih an la man loh te hi ACS Nishamoni Deka leh APS Rakesh Gupte te an nih thu an tarlang a, anni pawh hi police kutah hian an inpek ve thuai an beisei thu an sawi bawk.

Police-te chuan tunhnaia officer eng emaw zat an man mai bakah hian APSC exam paltlang midang 100 te forensic report an la nghah mek thu an sawi.

Assam Police-te hian APSC thu­buaiah hian mi 25 te exam chhanna lehkha chu forensic report aṭangin a lem a nih thu leh an kutziak nen a inmil loh thu an hmuchhuak a, hemi chung changah hian ACS leh APS officer 23 an man tawh a ni. An mi man zingah hian APSC Chiarman hlui Rakesh Kumar Paul pawh a tel a, Paul kut aṭang hian pawisa tam tham tak an man tel bawk.

Heng sorkar officer te hian hna an hmuh theih nan hian thamna an pek thu police report chuan a lo tarlang tawh a ni.