Manipur : Bomb puaka kaihhnawihah pahnih man

Manipur-a Chamdel District-a bomb kaihhnawihah mi pahnih man an nih thu Assam rifles thupuangtu chuan a tarlang.

November 13 khan Chandel District-a IED bomb tihpuah a ni a, pawikhawihtu nia rinhleh mi pahnih an man thu Assam Rifles te chuan an sawi a, an mi man te pawh hian an tih a nih ngei thu an sawi tawh bawk a ni.

Chandel District-a Mahamani thingtlang IED bomb puak vang hian Assam Rifles sipai pahnihin nunna an chan a, midang parukin hliam an tuar bawk a ni. He bomb puak hi PLA/RPF (People’s Liberation Army/Revolutionary People’s Front) te chuan an tih a nih thu an lo sawi tawh bawk.

Bomb tipuaktute hi police kutah an awm mek thu Assam Rifles te chuan a sawi a, bomb tihpuah nana an hmanraw hman pawh an kut aṭang hian man a nih thu an sawi.

Bomb puah duh lohna lantir hian Anal Society te pawn kawng an lo zawh tawh bawk a, Assam Rifles te pawn Manipur state chhunga venhimna ṭha a awm theih nan theihtawp an chhuah thu an sawi a ni.

Assam Rifles te chuan venhimna pawh khauh zawka kalpui mek a nih thu leh, bomb puahna area-ah hian remna leh muanna awm theih nan an theihtawp an chhuah thu an tarlang a, khawtlang mite nen pawh thawhhona ṭha an neih zel thu an sawi bawk.