ENPO-in state hran phût chungchangah meeting pawimawh nei

Eastern Naga People’s Organization (ENPO) chuan state hran, 'Frontier Nagaland' an phût chungchanga hma lak zel dan tur ngaihtuahin, nimin khan tribal pawl hrang hrang leh an hnuaia unit aiawhte nen meeting pawimawh an nei.

ENPO president Tsapikiu Sangtam chuan state hran siam chungchang chu an thu ngaihtuah ber a ni tih a sawi. Thla hmasa khan state hran siamna tura an phutin a huam chin, Nagaland state khawchhak lam biala MLA 20-te chu sorkar laipuiin an thil phut a ngaihtuahsak loh chuan bang vek turin an lo ngen

tawh bawk.

Kumin August 26 khan ENPO chuan resolution siamin, Nagaland khawchhak lam biala chengten state hran pe tura an ngenna chu sorkar laipuiin a ngaihtuah loh chuan, sorkar laipui leh state sorkar hnuaia inthlan buatsaihah tel ve tawh loh an rel. He resolution hi tribal pawl pasarih - Chang Khulei Setshang (CKS), Khiamniungan Tribal Council (KTC), Konyak Union (KU), Phom People’s Council (PPC), United Sangtam Likhum Pumji (USLP), Tikhir Tribal Council (TTC) leh Yimkhiung Tribal Council (YTC)-te chuan an thlawp. Kumina Hornbill Festival neih turah pawh tel loh an rel nghal bawk a ni.