Manipur Sangai Festival khuh hawng

Manipur chief minister N Biren Singh chuan Thawhlehni khan Imphal-a Kangla Gate-ah Sangai Festival 2022 khuhhawnna a nei. Festival khuh hawnna hi Nagaland ramri, Senapati district-a Moa gate-ah neih a ni bawk.

Festival hi November 21 aṭangin neih ṭan a ni dawn a, November 30 thleng a awh ang.

Kangla Gate-a khuhhawnna neihah hian Rajya Sabha MP Maharaja Leishemba Sanajaoba, minister leh MLA-te an tel a ni.

Kumin festival thupui atan hian 'Festival of Oneness' tih hman a ni dawn a, state chhung hmun 13-ah hman a ni ang. CM chuan, "Hmun pakhatah chauh festival hi neih a ni dawn lo a, mipuite an chhim ve vek theihna turin hmun hrang hrangah neih a ni dawn a ni," tiin Nagaland ramri bul, Mao-ah pawh neih a ni dawn tih a sawi. Festival hman tur hi chhim vek turin state mipuite bakah, state pawn lam leh ram pawn lam mite a sawm nghal bawk.

CM chuan festival hmanna pui ber tur chu Bishnupur district-a Moirang Khunou-a Sangai Ethnic Park-ah a ni dawn tih sawiin, he hmunah hian kumtin festival hi buatsaih a nih theihna turin permanent structure pawh buatsaih mek a ni, a ti.

Kangla Gate-a hun hmanah hian CM chuan Sangai Run pawh a vailiam a, Manipur Sangai Festival, 2022 theme song, Mangka Mayanglamban sak chu a tlangzarh nghal bawk.