Assam sorkarin IIM Bangalore MoU a ziahpui

Assam sorkar chuan Chief Minister's Young Professional Programme (CMYPP) atan Indian Institute of Management (IIM) Bangalore chu thawhpui turin inremna, memorandum of understanding (MoU) a ziahpui.

State sorkar chuan he programme hi health, education, women leh child development sector lama hmasawnna tura a duan niin, kum hnih atan IIM-Bangalore hi inremna a ziahpui a, nakkum aṭangin an thawk ṭan ang. Inremna an siamah hian Assam sorkar aiawhin principal secretary to CM Samir Kumar Singha leh IIM-Bangalore aiawhin director Rishikesha T Krishnan-ten hming an ziak.

CMYPP hian sector an tarlan takte tihchangtlunna turin, district thuneitute a pui ṭhin dawn a ni. He programme hmang hian sorkar hmalakna pui turin ṭhalai leh hruaitu ṭha tak tak chherchhuah a tum a ni.

Chief minister Himanta Biswa Sarma chuan IIM-Bangalore nena inremna an siam chu an state tana hmasawnna thlentu tur a nih thu sawiin, sorkar chuan hma an sawn theihna turin district level aṭangin hma a la tih a sawi.

CMYPP kalpui tur hian professional 75 lak an ni dawn a, district 35 chu professional pahnih zelin an vil ang. State headquarters-ah panga dahin department of health, education leh women and child development-ah pakhat ṭheuh leh, National Health Mission (NHM) leh Samagra Shiksha Abhiyan-ah pakhat ve ve dah a ni bawk ang. Professional-te hi competitive entrance exam hmanga lak an ni dawn a; social science, social work, public policy, public health, public administration, law, economics leh managment lama Master degree chinin an dil thei ang. Entrance exam hi IIM Bangalore chuan a buatsaih dawn a ni.