President-in hmarchhak hmasawnna tur chung chang sawi

President Ram Nath Kovind chuan Thawhlehni khan hmarchhak pumpui tan hmasawnna kawng hrang hranga neih a pawimawh thu sawiin, khawvel hmundang nena inkalpawhna ṭha, van lam leh tui lama siam a nih tur thu a sawi bawk.

Ram Nath Kovind chuan Arunachal Pradesh leh hmarchhak state dang ten rel hmanga inkal­pawhna ṭha an neih theih nan cheng veibelchhe 90, 000 invest a nih tur thu a sawi.

Imphal Comvention Centre-a Northeast Development Summit hawnnaah thu sawiin, President Kovind chuan Barak leh Brah­maputra lui hmanga Assam state-a inkalpawhna siam hna pawh kalpui mek a nih thu a sawi a ni. He Summit ah hian palai 175 vel an tel a, heng palaite hi India ramchhung mi bakah ram dang mi eng emaw zat pawh an tel thu official thuchhuah chuan a tarlang.

President chuan hmarchhak hmun hrang hranga airport hawn thar a ni chu lawmawm a tih thu sawiin, national highway leh ramri vela kawngpui awmte pawh tihchangtlun thuai a nih tur thu a sawi bawk a ni.

History-ah chuan reilote chhung hmarchhak state pariat te chu India ram chhung ni lo mah se India thinlungah an awm reng thu Kovind chuan a sawi bawk.

Northeast Development Summit-a ASEAN palai an tel chu lawmawm a tih thu sawiin, Presi­dent chuan kum 2018 Republic Day lawmnaah pawh tel leh ngei turin a sawm nghal a ni.

President Kovind-an Imphal a tlawh tur hi hel pawl hrang hrangte chuan an dodal nasa hle a, school, sorkar office leh bazar hmunte chu khar a ni hial a ni. Heti chung hian President hian Manipur hi a tlawh tho a, helpawl te chuan hei hi an duh lohna lantir nan darkar 26 chhung nawrh an huaihawt.

Manipur Chief Minister N. Biren Sing chuan summit-ah hian President bakah hian hmarchhak state pathum chief minister, sumdawng mi eng emaw zat leh investor eng emaw zat ramchhung leh ram pawn aṭanga an tel thu sawiin, Sangai Festival-ah an hmanpui bawk tih a sawi. Hel pawlte pawh President zin tur hi dodal lo tura a ngen a, mahse a ngenna hi an pawm loh thu a sawi.