Manipur-ah hmarchhaka organic outlet hmasa ber hawng

Manipur Horticulture and Soil Conservation Minister Thounaojam Shyamkumar chuan Thawhṭanni khan Organic Outlet, Mission Organic Chain Development for North East Region (MOVCDNER) scheme hnuaia siam chu a hawng. He hun hi Manipur Or­ganic Mission Agency (MOMA) buat­saih niin Directorate of Horti­culture and Soil Con­servation, Sajen­thong-ah hman a ni.

Hei hi hmarchhaka Orga­nic lam thil pho­chhuahna dawr hmasa ber niin, he dawr hi air condition hmanga thuam vek a ni a, nitin zing dar 7 aṭanga zan dar 8 thleng hawn ṭhin a ni ang.

Thounaojam Shyam­kumar chuan Organic outlet an siam hian mipuite rilru-ah nundan phung hrisel zawk a tuh ngei a beisei thu a sawi a, organic farming nasa zawka kalpui a ṭul thu sawiin department te pawh he lam hawi zawnga hma la turin a ti.

Horticulture and Soil Conser­vation department chu he dawr an hawn chungchangah hian hma nasa zawka la zel turin a fuih a, mipuite tan a awlsam zawk nan home delivery thleng pawha ti thei tura hma la turin a fuih bawk. Minister chuan department official-te chu lo nei mite ṭha taka lo dawngsawng ṭhin turin a chah bawk a, organic farming lama hma nasa zawka lak a nih theih nan mipuite nen ṭha taka thawhhona nei turin a ti bawk.

Shyamkumar chuan state chhunga private damdawi-in ding thar tam chuan mipuite hriselna a ṭhat tawk loh zia a ti lang niin a sawi a, hemi a nih avang hian department chu chaw ṭha leh hrisel tharchhuah lama hma la turin a ti a ni.

He hunah hian Dr. Suhel Akhtar, IAS, Additio­nal Chief Sec­retary (Agriculture) pawhin thu sawiin, organic lam thil tharchhuah te chu duhtu an tam loh chuan hma a sawn thei lo tih a sawi. Chumi a nih avang chuan hma nasa zawka la tura fuihin, organic state hmasa ber

Sikkim loneitute pawhin an thil tharchhuah a tam laia lei duh an tlem avangin harsatna an tawh thu a sawi.

Tun dinhmunah Manipur-ah hian MOMA hnuaiah organic farmers 5,000 an inziak lut a ni.