Tripura-ah journalist kaphlum

Tripura State Rifles (TSR) sipaite chuan Thawhlehni khan Western Tripura-ah inhnialbuai vangin journalist pakhat an kaphlum a, hemi avang hian hmarchhak hmun hrang hrangah buaina a thleng nasa hle a ni.

TSR Second Battalion Rifle­man Nandu Kumar Reang chuan AK-47 hmangin Bodhjung Nagar-ah kum 50 mi, journalist Sudip Datta Bhowmick a kahhlum thu police official thuchhuah chuan a tarlang. Reang hi Second Battalion Commandant Tapan Debbarma vengtu a nih thu an sawi bawk.

Journalist an kahhlum tak hian Debarma hi an batallion headquarters, Tripura aṭanga km 25 vela hla a awm chu hmu turin a kal a ni. Police-te hian TSR sipai hi an man nghal a, pawikhawihna thlenna hmunah hian police hotu eng emaw zat an kal nghal a ni.

Bhomwick hi "Syandan Patrika" leh TV Channel " Van­guard" repor­ter a ni a, a ruang hi Gobind Ballav Pant Medical College, damdawi-in ni nghal bawkah an kalpui nghal a ni. Damdawi-inah nian Nilaini thleng khan dah a nih dawn thu official te chuan an sawi.

Bhomwick hian a nupui leh a fate pahnih a kalsan a ni.

Chief Minister Manik Sarkar chuan pawikhawihtu hi a dem thu sawiin, Director General of Police chu thil thlen dan chhuizui nghal turin a ti nghal bawk. BJP leh CPI-M hruaitute chu damdawi-inah hian rang takin an thleng nghal a ni.

Journalist kahhlum a nih thu an hriat hnu hian hmarchhaka journalist pawl hrang hrang, a bikin Tripura Working Journalists Association, Tripura Journalists Union (TJU) leh Agartala Press Club te chuan pawikhawihna thlen dan hi chhui zui tura an phut thu an sawi nghal bawk.

Tripura-ah hian September 20 khan TV journalist, Santanu Bhowmick chu thah a lo ni tawh bawk a ni.