Manipur-ah hel 31 an ralthuam nen sorkar kutah an inpe

Manipur-a helpawl hrang hranga member 31-te chu Nilaini khan an ralthuam nen sorkar kutah an inpe. Hel inpe zingah hian hmeichhia pali an tel.

Imphal-a MR Banquet Hall-a 'Homecoming Ceremony' buatsaihah, hel inpete hian an silaite nen chief minister N Biren Singh hmaah an inpe a ni. He inkhawmah hian minister - Th Biswajit Singh, Govindas Konthoujam, Dr Ranjan Sapam, L Susindro Meitei-te bakah MLA te, chief secretary, DGP, police official-te an tel.

Hel inpete hi Kangleipak Communist Party-People’s War Group (KCP-PWG) mi 17, People’s Revolutionary Party of Kangleipak (PREPAK) aṭang paruk, United National Liberation Front (UNLF) aṭangin pali, Kanglei Yawol Kanba Lup (KYKL) aṭangin pathum leh PREPAK (VC) aṭangin pakhat an ni.

Chief Minister chuan hel inpe lo lawmna thu sawiin, midang tam zawk pawh an inpek belh zel a beisei leh a rin thu a sawi a, Manipur hmasawnna tura an hmalakna leh hnathawh hrang hrangah thawhpui turin a sawm nghal bawk.

Hel inpeten ralthuam an pek luh zingah hian NM 6 rifle, M4 carbine, Lathode gun, single barrel rifle, .32 pistol, .22 pistol, 12 mm bore pistol, lathode shell leh IED te a tel.

Kumin July thla khan Liberation Tigers of Tribals (LTT) helpawl member 12-te chu Imphal-ah thuneitute kutah an lo inpe tawh bawk a ni.

Union ministry of home affairs-in hmarchhak biala hel inpete chhawmdawlna tur scheme a siamah, hel inpete hi an bank account-ah kum thum chhung fixed deposit-in Rs nuai 4 dah sak an ni a, thla tin stipend Rs 6,000 pek an nih bakah, an ralthuam thehlut man pek tel an ni bawk ṭhin. Hel inpete hi rehabilitation camp-ah kum thum an awm a ngai thung.