TMC general secretary-in Meghalaya tlawh

Trinamool Congress (TMC) general secretary Abhishek Banerjee chu ni hnih cham turin nimin khan Meghalaya-ah a zin.

Abishek Banerjee hian nimin khan Garo Hills-a an party office thar a hawng nghal a, vawiin hian Tura-ah public meeting a nei ang. Party hruaitute pawh meeting a neihpui dawn tih TMC thuchhuah chuan a tarlang.

Nikum November thla khan Meghalaya-a Congress MLA 17 zinga 12 chuan TMC hi an zawm a, hei vang hian assembly-ah eptu party lian ber an ni mek a ni. TMC hian West Bengal-a sorkarna an siam hnuah, an huang zauh tumin hma an la mek a; Goa, Haryana, Tripura leh Meghalaya-ahte indinnghet tumin an bei mek a ni. Goa assembly inthlanah leh Tripura civic body inthlanah pawh an lo chuh tawh a ni. Meghalaya assembly inthlan hi nakkumah neih a ni dawn a, hei vang hian TMC pawhin ṭan an la chho hle.