Assam : Agriculture sector thuam chakna tur programme tlangzarh

Assam sorkar chuan agriculture sector thuam chak a, loneituten tam zawk an thar chhuah a, an sum lakluh a leta tihpun a nih theihna tura special programme a duan, Assam Millet Mission chu Nilaini khan a tlangzarh.

Chief minister Himanta Biswa Sarma chuan Guwahati-ah Assam Millet Mission hi tlangzarhin, virtual hmangin Bongaigaon, Morigaon, Udalguri, Golaghat, Karimganj leh Darrang-a Soil Testing and Quality Control Laboratory-te leh, Dhemaji leh Titabor-a knowledge centre a hawng nghal bawk.

CM chuan mission chu an state-a taksa tana ei tur ṭha tam zawk tharchhuah a, loneitute sum lakluh a leta tihpunna tura duan a ni tih sawiin, he mission hi Prime Minister-in intodelhna tur, Atmanirbhar a kalpuina zulzuia duan a ni, a ti. Assam agriculture department chu millet mission kalpuina tura hma lakna avangin a lawmpui thu a sawi a, thlai chinna ram hectatre 25,000-a zauah he mission hi kalpui phawt niin, a hnuah hectare 50,000-ah zauh a ni dawn tih a sawi.

Sarma chuan knowledge centre-te chu loneituten millet farming chungchanga hriat tur pawimawhte an hriat theihna tur a ni tiin, a pui thei dawn hle a ni, a ti bawk. Knowledge centre hi Rural Infrastructure Development Fund (RIDF) hnuaiah state chhung hmun hrang hrangah 96 hawn belh a ni dawn tih a sawi bawk a ni.