Nagaland Congress-in Bharat Jodo Yatra nei dawn

Nagaland Pradesh Congress Committee (NPCC) chuan November 19, prime minister hlui Indira Gandhi piancham phaah Bharat Jodo Yatra neih an tum.

NPCC joint coordinator Rajesh Kumar Sethi chuan, yatra hi DC court junction, Dimapur-ah zing dar 7 aṭanga nei ṭanin, Chumukedima gate thleng an kal dawn a, km 20 vel an kal dawn tih a sawi.

Yatra an neihnaah hian hmun pathum, Supermarket, 4th Mile leh a tawp kharna tur Chumukedima gate-ah te rei vak lo an chawl ang. He hun hi AICC general secretary in charge Nagaland Jananit Mukherjee chuan a hmanpui dawn a ni.

Sethi chuan yatra an neih turah hian thupui atan, 'save Nagaland save nation' tih an hman tur thu a sawi. Congress party hian Rahul Gandhi kaihhruaia inlungrual leh inhmangaihtawn duhna lantirna Bharat Jodo Yatra an nei mek a ni. Gandhi hoa yatra neih meka an state an paltlang loh turah te Congress hian a hranin yatra hi an lo hmang ve bawk a, he yatra hi BJP-in inthliarna leh inṭhendarhna policy a kalpui mek tihtawp a nih theihna atana tih an nih thu an sawi.

NPCC secretary (org) leh joint coordinator Akavi N Zhimomi chuan November 19-a yatra an neih turah hian tel turin state mipuite a sawm a, district hrang hrangah an la huaihawt chhunzawm zel dawn tih a sawi nghal bawk .