NSCN-IM nen Inremna siam puangzar turin President ngen

Manipur Congress chuan Nilaini khan President Ram Nath Kovind-a hnenah memorandum thehlutin, Prime Minister Narendra Modi-a kaihhruai sorkar laipui leh Naga helpawl, Nationalist Socialist Council of Nagaland Isak-Muivah (NSCN-IM) ten kum 2015 August thlaa inremna thutlung an ziah tun thlenga tlangzarh la ni lo chu tlangzarh thuai turin an ngen.

Congress Party hruaitu chuan sorkar laipui lamin mipuite leh state sorkar hnenah an inremna siam hian Manipur, Assam leh Arunachal Pradesh te ram chin a khawih buai lo ang ti mah se Naga pawl ṭhenkhat an lawm hle a ni, a ti.

President hi Manipur-ah hian Northeast Development Summit leh Sangai Festival hmangin ni hnih a cham a ni.

Congress President TN Hao­kip chuan President chu BJP thutlukna langtlanga siam turin an ngen thu a sawi. Haokip chuan, "Kan thil ngiat chu thil ho te, an inremna siam te tlangzarh se kan ti mai a ni", tiin state pathumte ramri chin tihbuai a nih an hlauh vang a nih thu a sawi. President mimal ngaihdan tak phei chuan an ngaihdan chu a ṭawmpui thu a sawi bawk.

Manipur Chief Minister hlui Okram Ibobi Singh pawhin state dang ramri chin a tibuai dawn lo a nih chuan an inremna siam chu an pawm tur thu a sawi. Singh chuan an inremna siamah thil pawi a awm a nih loh chuan eng vangin nge sorkar laipui lam hian an tlangzarh duh loh tiin zawhna a zawt a, Congress sorkar in Punjab leh Assam accord a ziahpui pawhin mipuite hmuh theiha tlangzarh a nih thu a sawi bawk.

Ibobi Singh chuan Prime Minister hnena sorkar laipui leh NSCN-IM inremna siam tlangzarh tura phutna memo­randum an siam pawh khan, drafting committee-ah party hrang hrang aiawh an tel laiin an party telh ve an nih loh thu a sawi.

Congress hian sorkar laipui leh NSCN-IM inremna thuthlung siam chu tlangzarh phutin state chhung hmun hrang hrangah sit-in protest an nei a ni.