AP-ah kangmei chhuakah mi 5 thi
Arunachal Pradesh-a Lower Subansari District-a Old Ziro Kudung Barang Colony-ah Thawhlehni tlai khan kangmei nasa tak a chhuak a, kangmei chhuak vang hian mi panga in nunna an chan.
Arunachal Chief Minister Pema Khandu chuan kangmei vanga nunna chan te chu a tawrhpui thu a sawi a, kangmei chhuahna district hruaitute pawh a ṭul ang anga ṭanpui hna thawk tur leh hliam tuarte chhawmdawl turin a ti a ni. Kangmei vanga hliam tuarte leh nunna chan chhungte chu danin a phal ang chinah chhawmdawlna ṭha tak pe turin a ti bawk.
Pema Khandu chuan nunna chan an awm avanga pawi a tih thu a sawi rualin chhiattawk chhungkua te pawh ṭha taka enkawl an nih tur thu a sawi a, helam buaipuitu department pawh an bungraw chan te hrechiang turin leh chenna hmun ngaihtuahsak turin a ti.
Kudung Barang Colony-a kangmei a chhuah hma lawk, Pathianni khan Hari thingtlang khuaah kangmei a chhuak bawk. Hei vang hian CM chuan fimkhur lehzual a ṭul thu a sawi. Khan chuan thla a sik chhoh avangin in tih lum nan lalṭin leh mei te hman a ni nasa a, fimkhur a ṭul lehzual a ni,a ti. Police leh sorkar te chuan kangmei a chhuah hnuah chauh hma an lak theih avangin kangmei chhuak thei tur laka inveng turin mipuite a chah bawk a ni.