Nagaland-a NIA lakir turin sorkar laipui ngen

Nagaland sorkar hnathawk te chuan Thawhlehni khan kawngzawh huaihawtin, sorkar laipui hnenah National Inves­tigation Agency (NIA) te chu state chhung aṭanga lakir turin an ngen.

NIA te hian Nagaland-a state sorkar department hrang hrang-ten Naga National Political Groups (NNPGs) hnenah dan lo anga chhiah an pek ṭhin chungchang an chhui chiang a ni.

Confederation of All Naga­land State Services Employees’ Associations (CANSSEA) me­morandum thehluh-ah chuan NNPGs te hnena chhiah an pek ṭhin chhan diktak chu an duh vang leh anmahni duhthlanna vang a ni lo niin a inziak a, tihluihna vang chauha chhiah hi pe ṭhin an nih thu a inziak a ni.

Confederation hian kawng an zawh zawh hian Gover­nor P B Acharya hnenah memorandum hi an thehlut nghal a, an thu thehluh chu sorkar laipui hnenah a rang thei ang bera thlen turin an ngen nghal bawk.

CANSSEA president Dr Zase Chusi leh general secretary Tarachu Fithu te chuan sorkarin department hrang hrang ten NNPGs hnena chhiah an pek ṭhin chungchang chhui tura NIA a koh luh hnuah hian official pasarih man an nih tawh tih an sawi.