Meghalaya-ah Art of Living member pahnih man

Art of Living foun­dation member pahnih chu Meghalaya-ah man an ni tih Thawhlehni-a Meghalaya police thu­chhuah chuan a tarlang. Heng an mi mante hi dan kalha che ṭhin Hyn­niewtrep National Libe­ration Council's (HNLC) hruaitute Bangladesh-a hmuh tum nia rinhlelh an nih vanga man an nih thu Police te chuan an sawi.

West Jaintia Hills district police chief Vivek Syiem chuan an mi mante hi Khroo Lamsalanki Pariat leh Samir Jolly te an nih thu a sawi a, Thawhṭanni khan Dawki Police checkpost-ah man an nih thu a sawi bawk.

Art of Living Foun­dation lam chuan an senior faculty, Jolly leh a ṭhuihhruai Pariat-te hi remna zawnga kal tum an nih thu leh an kal tumna hmuna ṭhalai tam tak rilru sukthlek dik lo te a ṭha zawnga kaihhruai tuma kal an nih thu an sawi. Officer chuan Thawhlehni-a meeting neih tura tel tum an nih thu a sawi.

Syiem chuan an mi man te hian Bangladesh kal an tum chhan hi an la sawi duh lo a, HNCL te nen inbiakna an nei tih erawh an Publicity Secretary Sainkupar Ningtraw leh midang ṭhenkhat kaltlangin an hriat theih thu a sawi. Hemi a nih avang hian Unlawful Activities (Prevention) Act hnuaia dan pawna hnawl pawl hmuh an tum nia an rinhlelh avang hian chhui zui an nih tur thu a sawi bawk a ni.

Art of Living Bureau of Communication, Mansi Dharmraj chuan an thiltih chu Sri Sri Ravi Shankar thlirlawk anga ṭhalai tam tak nunkawng hruai khaw loh te kawng dik kawhhmuh tumna a nih thu sawiin, Manipur-ah pawh Art of Living te chuan firfiak 68 lai a ko haw niin a sawi.

Dharmraj chuan Art of Living ten United Li­be­ration Front of Assam (ULFA) leh Manipur chhunga hel pawla tel ṭhin an ralthuam te dahthla a, an pawl ban­san te chu nunkawng ṭha an kawhhmuh ṭhin thu sawiin Sri Sri Ravi Shankar ngei pawhin an vela hel pawl hruaitute chu an thil phut, tharum thawh lo zawnga tihlan dan tur a kawhhmuh ṭhin thu a sawi bawk a ni.