Nagaland : NPF Liezietsu Group-ten General Convention nei

Election Commission (EC) thupek zawmin Nagaland-a rorel lai Naga Peoples' front (NPF) te chuan Nilaini khan general convention an nei. Party chhunga pawl pahnih awm zinga thlawptu ngah zawk tih chian tumin convention hi an nei a ni.

EC chuan October 17 khan pawl pahnihte chu an election symbol atana 'arpa' hmang tur zawk tichiang turin a ti a, NPF hnuaia pawl pahnih awm te hian he symbol hi hman inchuh­in an inkarah pawh buaina a awm reng a ni.

NPF hnuaiah hian pawl pahnih, chief minister hlui Shurhozelie leh Lok Sabha MP Neiphiu Rio thlawptu pawl te an awm a, October thlaa EC thuchhuah chuan heng pawl pahnihte hian thla hnih chhunga an election symbol tur tichiang ngei turin thupek a lo chhuah tawh bawk.

Liezietsu thlawptu lam thupuangtu, Achumbemo Kiko chuan Election Commi­ssion thupek anga general convention an koh thu sawiin, NPF constitution in a ruahman ang pawh an tihhlawhtlin nghal bawk niin a sawi. An thutlukna siam ang chu EC hnenah kar leh lam hian an thawn nghal dawn thu a sawi.

MLA 36 neitu, Rio pawlte chu he convention-ah hian an tel ve lo thung a, September 20 khan Dimapur-ah general convention hi an nei tawh niin an sawi. Nagaland Assembly inthlanpui hi kumthar February thlaa neih tura ruahman a ni.

July thla aṭang khan Party chhunga buaina hi a inṭan a, August 17 khan Rio chuan party president-a thlan tlin nia in sawiin election symbol hi a chuh a ni. Hei vang hian EC chuan NPF constitution-in a sawi angin general convention-ah party member hmun thuma ṭhena hmun hnihin thutlukna an siam tur a ni, a ti.

NPF general election-ah hian KC Kenye chuan office bearers list bakah president nomination a tarchhuak a, party president atana Dr. Shurhozelie Liezietsu party nominate chu tumahin an sawi buai loh avangin Kenye chuan a term a hman zawh tur thu a puang nghal a ni. Liezietsu hian a term a hman zawh chuan January 2020 thleng party hotu nihna hi a chelh dawn a, 2015 aṭang khan NPF president hi a ni ṭan a ni.

Official te tarlan danin NPF party-ah hian active member 22, 000 an awm mek a ni.