Arunachal Pradesh-in e-ILP pechhuak ṭan

Arunachal Pradesh sorkar chuan Ningani aṭang khan electronic inner line permit (e-ILP) a pechhuak ṭan ta.

Chief minister Pema Khandu chuan online e-ILP portal (eilp.arunachal.gov.in) hi Itanagar-ah a tlangzarh a ni. He portal hian Arunachal Pradesh IT depart­ment, state tourism department leh national informatics centre (NIC)-ten an siam a ni.

CM Khandu chuan e-ILP an pechhuak thei chu khualzin, an state-a lut turte tan a ṭangkaiin a awlsam phah dawn hle tih a sawi. Khualzin tan ILP dila an pawmsak hun an nghah ṭhinte chu eILP-ah chuan a awm dawn lo a ni, a ti. e-ILP hi ID card-based registration hmanga pein, mobile-based self verification leh QR code based pek an ni a, hengte hi police-te chuan mobile based application hmangin awlsam takin check-gate ah an lo endik tawh dawn a, hun khawhral a awm dawn lo a ni, a ti.

Khandu chuan an state-a tourism chawikanna turin ruahmanna siam a ṭul thu a sawi a, tourism sector chu state economy tichak thei tur, ṭhalaite tana hna tam tak siam theihna a nih thu a sawi.