Manipur-in Femina Miss India 2023 finale a thleng dawn

Manipur khawpui, Imphal chuan nakkuma Femina Miss India thlan turah grand finale a thleng dawn. Grand finale hi April, 2023-ah neih a ni ang.

Femina Miss India grand finale hi hmarchhak state-ah neih a nih ṭum khatna tur a ni. Hemi atan hian Ningani khan Imphal-a CM Secretariat-ah Manipur sorkar-a tourism deparment leh Times Group chuan thawhdunna tur inremna an ziak a, chief minister N Biren Singh leh Times of India managing director Vineet Jain-ten an telpui.

CM Singh chuan Femina Miss India 2023 grand finale neihna tur hmun thlan a ni chu lawmawm a tih thu sawiin, hei hian an state leh hmarchhak bial chu investor lamin an ngaihven chho hle tih a lantir a ni, a ti.

Times Group M Vineet Jain pawhin Manipur chuan gender equality leh women empowerment lamah India state-a hmahruaitu zinga mi a ni tiin, Manipur-a hmeichhia hnathawk awm zat chu chawhrualin ram pum huap aiin a letin a sang zawk a ni, a ti. Manipur chuan sports lamah pawh hmeichhia ropui tak tak a chherchhuak a ni tiin, Mary Kom, Saikhom Mira­bai Chanu, Kunjarani Devi leh Laishram Sarita Devi-te hming a sawilang.

Hei vang hian Miss India tan pawh thawhpui an chakawm hle a ni, a ti.