Arunachal Pradesh : PM-in Donyi Polo Airport a hawng

21st November, 2022

Prime minister Narendra Modi chuan Inrinni khan Arunachal Pradesh-a greenfield airport hmasa ber, Itanagar bul Hollangi-a Donyi Polo Airport a hawng.

Donyi Polo Airport hi Itanagar aṭanga km 15 vela hlaa awm niin, ram acre 690 a zauah Rs vcb 640 senga siam a ni. Runway hi meter 2,300-a thui a ni.Airport siamna tur lungphum hi kum 2019, February thla khan PM Modi hian a lo phum tawh a ni.

PM Modi chuan inkalpawhna ṭha neih a pawimawh thu sawiin, airport thar chuan cargo service lamah hmasawnna a thlen dawn a, state chhunga loneitute pawhin market lian zawkah an thil tharchhuahte an hralh thei dawn a ni, a ti.

Modi chuan state chhung hmun kilkhawr zawkte pawh kalpawhna ṭha siam a ṭul tih sawiin, Pradhan Mantri Gram Sadak Yojna hmangin Arunachal Pradesh-a thingtlang khua 85% chu thlunzawm an ni tawh tih a sawi. Sorkar laipui chuan AP-a infrastructure lam tihhmasawnna turin Rs vbc 50,000 a hmang dawn tih a sawi bawk.

Sorkarin Vibrant Border Village Programme hnuaia border area-a khaw hrang hrang tihhmasawnna tura hma a lak dante sawiin, PM chuan hei hian tourism sector lam a thuam chak dawn bakah dan loa pem lutte a ven phah theih dawn a ni, a ti.

Prime Minister hian 600 MW Kameng Hydro Power Station chu a hawng nghal bawk. He power station hi Rs vbc 8,450 senga siam a ni. He project hi kum 2005 February thla aṭang thawh ṭan a ni a, vawi tam tak zawh hun tura hun tiam chu pawhsei a ni.

Airport hawnna inkhawmah hian chief minister Pema Khandu pawhin thu a sawi a, aviation map-ah Donyi Polo Airport a awm tak avangin state mipuite chuan an chhawr ṭangkai dawn hle a ni, a ti. An state tan chuan ni chhinchhiah tlak a nih thu sawiin, economic activity lamah pawh hma an sawn phah thei dawn tih a sawi.

Khandu chuan kum 1960 chhoa siam, an state-a advanced landing ground pasarihte chu siam ṭhain hman mek an nih thu a sawi bawk. Hindustan Aeronautics Limited leh Airports Authority of India (AAI) chuan fixed-wing Dornier 228 aircraft hmangin state chhungah air service an kalpui thuai dawn tih Chief Minister chuan a sawi.