Tripura Congress-i'n ‘Bharat Jodo-Tripura Bachao’ kawngzawh buatsaih

Tripura Pradesh Congress Committee chuan Inrinni liam ta khan state chhung hmun 14-ah Bharat Jodo Tripura Bachao’ kawngzawh an nei a, kawngzawh hi ni sarih chhung an nei ang.

Congress CWC member leh AICC in-charge Tripura Dr Ajay Kumar chuan Agartala-a Congress Bhavan-ah kawngzawh hi a hawng a ni. Agartala bakah district headquaters leh sub-division headquarters-ahte neih a ni bawk a, tel an ṭhahnem hle.

Agartala-a kawngzawh hi Congress MLA Sudip Roy Barman-a'n a ho a, khawpui chhung hmun hrang hrangah an kal a ni. "State mipuite tan kan bei a ni. Thil man sang zel kan duh loh thute kan aupui a, ṭhalai hna neilote tana hna thawh tur siamsakte kan phut bawk. He kawngzawh hi Congress tan chauhah tih a ni lo a, state mipui nawlpuiten harsatna an tawn mek hrang hrangte kan pholang nghal a ni," tiin Barman chuan a sawi. Ni sarih kawng zawh chhung hian km 1,200 vel an kal hman dawn niin senior leader Asish Saha chuan a sawi. He kawngzawh hian an party intuaitharna kawngah pawh a pui dawn hle a, mipuite nena inzawmna ṭha zawk siamna tura campaign pawimawh tak a ni tel a ni, tiin party lam thuchhuak chuan an tarlang.

Hetih lai hian MLA hlui Dilpui Muhri kaihhruaia Belonia-a kawngzawhte leh BJP worker-te an intibuai a, Congress worker ṭhenkhatin hliam an tuar. Buaina lian tham zawk a chhuah hmain police-ten an thunun hman a ni. Saha chuan kawng an zawh laiin BJP worker-te hian an rawn bei niin a sawi a, buaina siamtute hi man tura phutin Belonia police station-ah Congress worker-te hi an pungkhawm zui bawk.