Meghalaya : Study tour bus-ah ruihhlo tam tham tak man

Manipur aṭanga Meghalaya khawpui, Shillong-a kal tur zirlaite chuanna bus-ah heroin cheng vaibelchhe 14 hu an man .

Ri Bhoi police-te chuan an thu dawn bawhzuiin, Saiden khaw bula National Highway 6 ah ruihhlo hi an man a ni. Heng ruihhlote hi sahbawn bawm 158 ah an dah a, bus cabin hnung lamah an lo thukru a ni.

Bus-ah hian study tour nei tura kal zirlaite an chuang a, ruihhlo man a nih tak avang hian police-te chuan zirlaite hruaitu tur motor dang an ngaihtuahsak nghal bawk. Bus driver leh a puitu mi pahnihte chu manin thubuai siamsak nghal an ni a, an vai hian Manipur lam mi an ni.