Foreigners Tribunal member 200 ban chungchangah SC-in sorkar laipui leh Assam sorkar hriattirna a pe

Supreme Court chuan Assam-a National Register of Citizens (NRC) kaihhnawih case buaipui tura Foreigners Tribunal (FT) member atana ruat zinga 200-te ban an nih chungchangah, sorkar laipui leh Assam sorkar chu thil awmdan sawifiah turin hriattirna a pe.

Assam sorkar chuan Home Department kaltlanga thuchhuah siamin, FR member 200-te hi September 23 aṭang khan an service a titawp sak a ni. Member ban takte hian ban an nih danah lungawi loin, Assam sorkar thutlukna siam chungchang hi Supreme Court-ah an khing let a ni.

Petition thehluttute aiawh, advocate chuan Supreme Court hnenah foreigner case tihkhawtlai tam tak la awm mek ngaihtuah tur hian tribunal hi 200 din belh a ngai tih a sawi a, tunah hian tribunal-ah foreigner case tihkhawtlai mek hi nuai 1.5 vel a awm a ni, a ti. "Hetih lai hian sorkar chuan NRC buaipui tura member lak belhte chu dik lo takin an service a tihtawp sak a ni. Sorkar thiltih dan hi Constitution-a article 14 leh 16 bawhchhiatna dik tak a ni," tiin a sawi.

Foreigners' Tribunal (FT) hi quasi-judicial body niin, FT member-te hi judge designation ang pek an ni. FT member nghet hi 100 an awm a, mahse kum 2019, August thlaa NRC final draft tihchhuah a nih hnu khan Assam sorkar chuan FT member atan hian mi 200 a ruat belh a, an ruatte hi lawyer thawk lai leh pension tawhte bakah judicial officer-te an ni.

Anni hian NRF final list-a teh loh, mi nuai 19.06-te case an buaipui a ni. Mahse member ruatte hi sorkar chuan a hrana hriattirna pe loin, Home Department kaltlanga thuchhuah hmangin an service hi a titawpsak ta a ni.