NPP-BJP thawhdun tur chungchang chu inthlan zawhah a ṭul dan azirin ngaihtuah a ni ang : Meghalaya CM

Meghalaya chief minister, National People's Party (NPP) national president Conrad K Sangma chuan BJP nena thawhdun chungchang chu inthlan zawhah a ṭul dan azirin ngaihtuah a ni chauh ang, a ti.

Conrad Sangma chuan assembly inthlan lo awm turah, inthlan hma chuan BJP nena thawhdunna tur siam an tum lo tih a sawi a, "Keimahni party bil hmingin inthlan kan chuh ziah a, NPP hian inthlan hmain party dangte thawhpuina tur inremna a siampui ngai lo," tiin a sawi. Manipur, Nagaland, Mizoram leh Arunachal Pradesh-a assembly inthlanahte pawh midang thawhpui loa an chuh thu a sawi.

Meghalaya-ah chuan BJP-in an party malin sorkar an siam thei lo tih sawiin, "BJP chuan sorkarna an siam dawn tih an sawi a, mahse hei hi a thlen dik ka ring lo," a ti. Eptu party, Congress an phel hnuah Meghalaya-ah chuan eptu lam an ṭangrual thei tawh lo a, mipuite pawhin an ring ngam lo niin a sawi bawk. Congress party MLA zahve aia tamin Trinamool Congress an zawm a, mahse TMC pawh an phel leh dawn nia sawiin, assembly inthlan neih hmain TMC MLA eng emaw zat chuan NPP an zawm dawn a ni, a ti.