Assam-Meghalaya ramria buaina thlengah mi 6 an thi

Assam-Meghalaya ramri-a nimina buaina chhuakah mi paruk an thi tawh a, thi zingah hian Assam forest guard pakhat a tel.

Assam forest department chuan nimin zing dar 3 vel khan West Jaintai Hills district, Meghalaya aṭanga dan loa thing phurtu nia sawi, truck chu Murku area-ah an lo dang a, truck hi tlanchhiat a tum laiin forest guard-te chuan kapin a ke an kah thepsak a ni. Driver, handyman leh mi dang pakhat man in, motor-a chuang dangte erawh an tlanchhe hman a. Forest guard-te hian Zirikending police station biain, Assam police-te tirh nghal an ni.

Hetih lai hian, Meghalaya lam aṭangin chem kengin, mi eng emaw zat chuan zing dar 5 vel khan buaina thlenna hmun hi an pan a, Assam forest guard leh police-te chu an mi mante chhuah tura phutin an hual zui a ni. Police-te hian silaite an hmehpuak ve bawk.

Buaina chhuak vang hian mobile internet te tihtawp nghal a ni a, Meghalaya-Assam border, Jorabat-ah motor tlante pawh dintir zui an ni nghal a ni.

Meghalaya chief minister Conrad K. Sangma chuan thil thlen dan chungchang hi chhui chian a ni dawn tih sawiin, Assam chief minister Himanta Biswa Sarma pawh a biakpawh thu a sawi. Buaina chhuaka thi chhungte hnenah Rs nuai 5 ṭheuh pek a nih tur thu a puang nghal bawk.