Assam, Tripura leh Manipur-ah Vaihlo hmanna hluar

Global Adult Tobacco Survey (GATS) ten India hmarchhak state hrang hrang an zirchian naah 2009-2017 chhungin Assam, Tripura leh Manipur-ah vaihlo hmanna a hluar zual a, hetih lai hian ram pumpuiah erawh vaihlo hmang zat an tlahniam thung.

Ram pumpuiah vaihlo zuk chi nilo ṭhial/hmuam chi hmang hi 25.9 % aṭangin 21.4%-ah a tlahniam a, hetih lai hian Assam leh Tripura-ah erawh vaihlo hmang zat an pung hle tih GATS report chuan a tarlang. Sikkim-ah erawh an tlahniam hle a, hetih lai hian Mizoram, Meghalaya leh Nagaland-ah te chuan tlemte in an pung ve bawk.

State hrang hrangah second-hand smoke (SHS) rate a tlakhniam laiin Assam-ah erawh 3% in a pung thung a, ram pumpuiah vaihlo hmang hi 2009-10 leh 2015-17 survey an neihah 34.6 % aṭangin 28.6%-ah a tlahniam a ni. Hetih lai hian Assam leh Tripura-ah chuan vaihlo hmang hi an pung hle thung tih tarlan a ni a, Manipur-ah pawh eng emzaw zatin an pung bawk.

Assam-ah hian vaihlo hmang hi 39.3 % aṭangin 48.2 % in an pung a, Tripura-ah 55.9 % aṭangi 64.5 %-ah, Manipur-ah pawh 54.1% aṭangin 55.1 %-ah an pung ve bawk a ni.

Sikkim-ah erawh 42.6% aṭangin 17.9%-ah an tlahniam duai thung a, meizial zuk intihhmuhna hi rampumah 14% aṭangin 10.7%-ah a tlakhniam laiin Tripura-ah erawh 0.4 % in an pung thung. Hmarchhakah bikah chuan Nagaland-ah 31.5% aṭangin 13.2%-ah a tlahniam a, Sikkim-ah chuan 26.4% aṭangin 10.9%-ah an tlahniam bawk tih report chuan a tarlang a ni.

Puipunnaa meizial zu zat hi Meghalaya, Manipur leh Nagaland-ah chuan an tlahniam bawk a ni. Hetih lai hian kum naupangte nih lai aṭanga vaihlo hmang zat hi state pathum Aru­nachal, Nagaland leh Tripura-ah chuan an pung thung.

Report in a tarlan danin ram pumpuiah vaihlo tih larna lam hi a tlahniam hle a, hetih lai hian Mizoram-ah chuan cigarettes leh biri hi a lar zual hle a, Nagaland-ah biri intihhmuhna hi a nasa hle bawk. Zirchianna aṭanga a lan danin meizial packet-a a ṭhat lohna an ziah chuan awmzia a nei hle a, ram pumpuiah biri leh cigarette zuk bansan an tam phah hle a ni.

GATS te hian zirchianna hi chhungkaw hrang hrangah an nei a, ramchhung state hrang hrang 30-ah leh Union Territories pahnihah zirchianna hi kalpuiin, kum 15 chin chunglamah zirchianna hi an nei a ni. Assam Health Minister Himanta Biswa Sarma chuan GATS ten vaihlo chungchanga zirchianna an nei chu lawmawm a tih thu sawiin hmarchhak mite tan he an report siam hi thil hlu tak leh vaihlo hman ṭhat lohna inzirtirna kawngah pawh kawngro a sut a beisei thu a sawi.