Assam Chief Minister-in Corruption dona kawngah tumah dim dawn lo

Assam Chief Minister Sarbanada Sonowal chuan Prime Minister Narendra Modi-a'n corruption dona kawngah tumah veng­thawng lo tura a tih thu In­rinni khan sawiin, " Fin­fiahna ṭha tawk neih a nih phawt chuan tumah hum­himin an awm lo ang" a ti.

Sonowal chuan co­rruption do na kawngah tumah duhsak bik an neih dawn loh thu sawiin, Prime Minister pawhin tuma mitmei veng lo tura a tih thu a sawi. Sorkarna an chan ni aṭangin BJP sorkar chuan corruption an do nghal thu a sawi a, finfiahna a ṭhat phawt chuan chief minister meuh pawh a him bik dawn lo niin a sawi. CM chuan ramchhung inkaihhruai danah thil fel tawk lo awm leh chak tawk lohna lai te chu an hmuh thu sawiin, heng zawng zawng hi siamṭhat vek an tum thu a sawi bawk.

2015 kuma BJP zawm, Louis Berger bribery scam-a inhnamhnawih nia sawi Himanta Biswa Sarma nena thawhhona an neih chungchanga zawhna an siam chhangin, Sonowal chuan awmze nei lo in action an lak ngawt ngai loh thu a sawi a, finfiahna a awm a nih erawh chuan tumah an dim dawn loh thu a sawi.

Lois Berger bribery scam chhui hna hi CBI-te kutah dah a ni a, Guwahati High Court chuan CBI te kutah hian dah a nih thu puangin FIR pawh ziah luh a ni tawh a ni. US Company hian Goa leh Assam-ah water supply project dan loa a kalpui chungchangah Biswa Sarma hi inhnamhnawihah puh a ni.

Assam CM chuan prime miniter chu hmar­chhak lam a ngaihsak vanga a fak thu sawiin, prime minister awm tawh zawng zawnga hmarchhak-a theihna awm te hmanna lama rilru seng hmasa ber tu a nih thu a sawi.