Meghalaya : Garo Hills-a Engineering College hmasa ber tur lungphum phum

Meghalaya Chief Minister Mukul Sangma leh school and education and literacy minister Deborah Marak te chuan Zirtawpni kalta khan South West Garo Hills-a Ampati-ah engineering college tur, Ampati Engineering College lungphum phumna hun an hmang.

Mukul Sangma chuan he college sakna tur atan hian cheng vaibelchhe 41 sanction a nih thu sawi­in, college din a nih hnu­ah chuan tualchhung mi mithiam tam tak an chhuak dawn a ni, a ti.

Sangma chuan engi­neering college din leh zirna lama sum invest chuan ramchhung eco­nomic leh vantlang dinhmun pawh a thlak theih thu a sawi a, mithiam tam tak state chhunga an awm chuan sorkar tan pawh hmasawnna a thlen ṭhin thu a sawi bawk.

Meghalaya-a engi­neering college pahnihna tur lungphum phumnaah hian CM chuan enginee­ring college pahnih din kher a ṭul leh ṭul loh chungchangah zawhna an dawn fo thu sawiin, state hmasawnna lam pan mek an ni a, hmalam huna tih tur leh hmasawnna tur tam tak an neih thu a sawi. State chhungah hmun tam tak kawngpui mumal pawh la awm lohna a awm thu sawiin thil dangah pawh hmasawnna tur an la ngah thu a sawi. Sangma chuan kum 45 chhung state puitling an nih tawh thu sawiin, tun aṭanga kum ngaah state an nih kum 50-na lawm a nih tur thu leh hetiang ni chunga ramchhung hmundanga hmasawnna umphak tura nasa zawka beih an la ngeih thu a sawi a ni.

CM chuan Tura-ah Cap­tain Williamson Tech­nical University leh Mahendraganj-ah College of Science and Commerce an la din leh dawn thu a sawi bawk.