Arunachal Pradesh-a Rel kawng siamna turin sorkar laipuiin vbch 47 pe

Sorkar laipui chuan Arunachal Pradesh-a rel kawng siamna turin Northeastern Frontier Railway (NRF) hnenah cheng vaibelchhe 47.18 a pe. He sum hmang hian rel kawng pathum thuamṭhat a ni dawn a, heng zingah hian Misamari - Tawang line pawh a tel a ni.

Defence Secretary Sangjay Mitra chuan sorkar laipuiin rel kawng siam leh cheiṭhatna tur a pek thu hi a puang. November 4-a Defence Minister Nirmala Sitharaman-i'n Arunachal a tlawh khan, rel kawng chungchangah hian high level meeting neih a ni a, meeting-ah hian defence ministry hnuaia senior official te, Union minister of state for Home Kiren Rijiju, AP Chief Minister Pema Khandu leh, minister Nabam Rebai leh sorkar official eng emaw zat an tel a ni.

Meeting-ah hian Sitharaman-i chuan thu sawiin, rel kawng tichangtlung tura hma lak hi a ngaihpawimawh thu a sawi. A bikin China ramri depa awm Assam leh Arunachal hmun ṭhenkhatah relkawng changtlung zawk siam a ṭul thu a sawi a ni. India leh China-in bina an tawh fona hmun Tawang-ah pawh rel kawng hi siam a pawimawh thu a sawi bawk.

Defence Secretary chuan sum ruahman hi tihkhawtlai a nih loh tur thu sawiin, hnathawh nana mamawhte chu an pek chhuah thuia a ni ang, a ti. Hemi chungchang hi sorkar laipui pawhin a ngai pawimawh hle tih sawiin, 2017-18 chhungin hna hi ṭan hman tura ruahman ani, a ti. Sum indaih lohna aawm a nih chuan Indian Railway-ah thlen leh a nih tur thu a sawi bawk.